नवीन शिक्षक संचमान्यता विद्यार्थ्याच्या मुळावर,
दुरुस्ती नाही झाल्यास प्राथमिक शिक्षक संघ राज्यभर आंदोलन करणार
शिक्षक महासंघाचे राष्ट्रीय उपाध्यक्ष बाळकृष्ण तांबारे यांची माहिती
हेर्ले (वार्ताहर ):-शालेय शिक्षण विभागाने नुकत्याच सन 2024-2025 च्या शैक्षणिक वर्षासाठी मंजूर करण्यात आलेल्या शिक्षक संचमान्यते मध्ये अनेक त्रुटी झाल्यामुळे राज्यातील हजारो शिक्षक अतिरिक्त झाल्याने विद्यार्थ्यांचे मोठे नुकसान होणार असून प्राथमिक शाळा विस्कळीत होणार आहेत. ही संच मान्यता दुरुस्त करणे गरजेचे आहे.शिक्षक संचमान्यता मध्ये दुरुस्ती नाही झाल्यास व दि 15 मार्च 2024 चा शासन निर्णय रद्द नाही केल्यास महाराष्ट्र राज्य प्राथमिक शिक्षक संघाच्या वतीने राज्यभर तीव्र आंदोलन करण्यात येणार असल्याचा निर्णय शिक्षक संघाच्या सिनिअर कौन्सिल बैठकी मध्ये झाला असल्याची माहिती,राष्ट्रीय प्राथमिक शिक्षक महासंघाचे उपाध्यक्ष बाळकृष्ण तांबारे यांनी दिली आहे.
सन 2024-2025 या शैक्षणिक वर्षासाठी राज्य शासनाच्या शालेय शिक्षण विभागाने प्राथमिक व माध्यमिक शाळेसाठी शिक्षक संच मान्यता शासनाने ( शिक्षक पदनिर्धारण ) जाहीर केली आहे. ही संचमान्यता ऑनलाईन पद्धतीने झाली असली तरी यात अनेक चुका झाल्यामुळे राज्यातील प्राथमिक व माध्यमिक शाळेतील शिक्षकांची पदे कमी झाल्यामुळे राज्यात हजारोच्या संख्येने शिक्षक अतिरिक्त होणार आहेत . या झालेल्या चुकामुळे राज्यातील विद्यार्थ्यांचे शैक्षणिक नुकसान होणार आहे. अनेक शाळेतील 6 ते 8 च्या वर्गाला एकही शिक्षक मिळणार नाही. राज्यात नवीन संचमान्यता मुळे निर्माण झालेल्या परिस्थिती,
राज्यातील विविध शैक्षणिक समस्या व प्रश्नावर चर्चा करण्यासाठी शिक्षक संघाच्या सिनिअर कौन्सिल ची राज्यस्तरीय बैठक शिक्षक संघाचे नेते संभाजीराव थोरात यांच्या अध्यक्षतेखाली संपन्न झाली.
या बैठकीत मंगळवारी शिक्षण मंत्री दादा भुसे यांची भेट घेऊन संच मान्यतेतील त्रुटी दुरुस्त कराव्यात तसेच दि. 15 मार्च 2024 चा शासन निर्णय रद्द करण्याची मागणी करण्यात येणार आहे.
15 मार्च 2024 च्या शासन निर्णयानुसार शिक्षकाचे एकदा पद कमी झाले की पुन्हा निर्माण होण्याची संधीचा राहिलेली नाही.
तसेच पदवीधर व मुख्याध्यापक पदे निर्माण करण्यास अडचण निर्माण होणार आहेत.
या बैठकीस नेते संभाजीराव थोरात, अध्यक्ष बाळासाहेब मारणे, राष्ट्रीय आबासाहेब जगताप, राष्ट्रीय उपाध्यक्ष बाळकृष्ण तांबारे, कार्याध्यक्ष किसनराव इदगे, म. ज. मोरे, बळवंत पाटील, सचिन डिंबळे, संजय चेळेकर,मोहन भोसले,राजेंद्र जगताप,बब्रुवान काशीद भक्तराज दिवाने,विनायक शिंदे,चंद्रकांत यादव, रविकुमार पाटील, अनिरुद्ध पवार,सुधाकर पाटील अविनाश गुरव, लहू कांबळे, तात्या यादव,अशोक पवार उपस्थित होते.
*चौकट*
शालेय शिक्षण विभागाने 15 मार्च 2024 च्या शासन निर्णयानुसार संच मान्यता दिली आहे. हा शासन निर्णय शासकीय व अनुदानित शाळेवर अन्याय करणारा व स्वयं अर्थ साहाय्य तत्वावर चालणाऱ्या शाळेला पूरक असा आहे. शासकीय व अनुदानित शाळा बंद करून सर्वसामान्य जनतेच्या मुलांना शिक्षणापासून वंचित ठेवण्याच धोरण शासन आखत आहे की काय हा संशय येत आहे. 15 मार्च 2024 चा शासन निर्णय रद्द करून झालेली संच मान्यतेची दुरुस्ती नाही केल्यास प्राथमिक शिक्षक संघ राज्यव्यापी तीव्र आंदोलन करणार आहे.
बाळकृष्ण तांबारे
राष्ट्रीय उपाध्यक्ष
राष्ट्रीय प्राथमिक शिक्षक महासंघ
